（本報訊）黃宗澤（Bosco）成為邵氏兄弟公司的經理人合約藝人後，電影、劇集Keep住拍，就連方力申都要加盟做師弟，拍住上為公司賺大錢。密密吸金、已擁有多個物業的Bosco，日前專登飛到馬來西亞物色「新竇」：「有適合的不怕繼續入，等升值都開心。」

離開無綫後，Bosco於內地及香港都發展不俗，自從簽約成為邵氏兄弟公司經理人合約藝人，更拍攝多部電影及劇集，認真賺到笑。除了擁有自己的娛樂公司及餐廳外，懂得投資的他多年前已於香港買樓，近年更轉戰馬來西亞等地。與陳嘉桓傳緋聞的他，之前被指雙雙到馬來西亞旅行，其實他除了到那兒開會，原來還睇新樓盤，繼續物色「新竇」。

齋買新樓 包晒裝修易出租

Bosco已投資過千萬在馬來西亞擁有４層樓，全部更是新樓盤，他受訪時說：「我成日都過去！那兒好多新樓盤，耐唔耐都會飛過去看！我不嬲好鍾意買樓，在那裡都已經有幾層。（想著Keep住買幾多層？）當然愈多愈好，哈哈！看對不怕再入。」問到在彼邦置業有何要求？他說：「地段好、發展商好同有信譽，他們的樓好多包晒裝修、傢俬，好正！買了租給人，等升值都開心啦！」早前拍戲傷腳要做手術的他，至今仍要撐著拐杖行路，笑言「跛」住都要去買樓：「撐拐杖都要睇樓，都要食飯的！」