（本報訊）女人40一枝花，正是楊思琦的寫照，剛踏入40歲，思琦先推出噴血寫真，成績口碑比同期的「嫩模」好得多！最近思琦又有新挑戰，她找來著名監製陳浩然幫忙推出單曲《愛的森林》，思琦說：「40歲係一個特別的年份，之前就影靚相出寫真做慈善，之後有同人講我好鍾意唱歌，自己在電視台都唱過兒歌，曾經拿過獎，亦唱過電視主題曲，所以傾過不如嘗試出首單曲，好多人覺得森林係茂盛、嫩綠、豐富，好多姿多采，又有人覺得愛情係好冒險，可能對愛情有不同看法，我會唱自己的經歷、同大家分享，希望大家有同感。」除了和大家分享愛情經歷，經常到內地工作的思琦也希望出廣東歌，希望多留港發展。

　思琦剛剛在大陸拍完劇集《80度愛戀》，飾演女強人，感情世界錯綜複雜又曲折，問到她的感情世界，思琦謂：「我覺得都不過不失啦！最開心係有了小朋友，將感情轉移去家人的愛，其餘對愛情都好期待的，看幾時來臨。」思琦和舊愛李泳豪有過一段9年的愛情長跑，之後就是和囡囡卓穎（穎穎）的爸爸吳帥有過一段情，回想起這兩段感情，思琦說：「每個人都有唔同的經歷，可能同其他人比唔知多定少？其他人可能有更加多，我的每段感情都學習到東西，人生到老可能要遇到的令妳更加唔同，所以唔知會再遇到什麼類型的人，令我更加唔同？」思琦直言感情是沒有對錯，她說：「我唔會覺得失敗，好難用對錯去形容，但係享受當中的過程，看點睇感情的關係。」

　對於尋覓對象，思琦還有期盼，那麼思琦又有甚麼擇偶條件呢？她笑指：「其實好簡單，唔係外貌行先，因為年紀大了，覺得想找心態成熟、思想成熟的男士，因為他們成熟的會想到我的需要，識得點去愛我同我的家人，所以最緊要係個心，對我同家人好就夠。」

　多年來思琦和「富商」、「貪錢」等字眼扯上關係，問到思琦對此有甚麼想法？是不是想找個有經濟能力的伴侶？思琦笑謂：「乜我在你們心目中是這樣的嗎？我想時下女性可能大部份都有這個想法，唔單單係我自己，好多女仔都有咁的諗法，有好的經濟能力，收入穩定，樣樣會smooth一點，唔會有其他事出現，我會咁諗。」但思琦現階段最想自食其力，她說：「希望自強先，可以在工作方面發力，有收入來源支持自己先，因為如果單靠遇到個有錢的其實好渺茫囉！比較投機，未必畀你遇到，但自己點做就會有把握多一點，做好自己，暫時OK的。」

　恩琦囡囡已經6歲大，雖然做了單親媽媽，但思琦依然對婚姻充滿憧憬，她說：「可能冇結過，都好想結！而家都有追求者，希望快點遇到真愛。我唔抗拒再生小朋友，因為自己都好鍾意，同埋我囡囡成日問我幾時有little brother，佢好想有個細佬，看有冇機會，唔勉強的，有句我好鍾意的歌詞：『當相信愛情靠信任，要找的人憑我用決心吸引』我相信自己有優點終會吸引到人喜歡我，我好樂觀、關心人，大家來感受啦！」會不會想組織新家庭？思琦笑謂：「都想，不過唔知會點呢？因為自己有個家，如果又組織一個家，咁多step唔知會點。」