（本報訊）27歲G.E.M.（鄧紫棋）前年戀上富二代造型師Mark，兩人不時被撞破戀情，日前他們拍拖去圓方看電影，被讀者劉先生透過「爆相爆片」分享，原來G.E.M.在男友面前變小女人，溫柔體貼萬事遷就，更負責埋單找數添，可以挑機唐詩詠的絕世好女友寶座。

劉先生接受《蘋果》電話訪問表示，日前晚上9點幾，在圓方見到G.E.M.同男友拍拖睇戲：「當時他們前後腳行圓方，向住戲院方向行，初時冇留意到她，只見到有個女子戴帽又戴口罩，再望個男仔，就認得係佢個男友。」從讀者提供「爆相爆片」所見，遮晒樣的G.E.M.僅露出一雙眼，男友都戴了cap帽遮掩，越低調越引人注目。

剛巧讀者都係睇夜晚10點場《大黃蜂》，所以跟住兩人後面行到戲院：「他們去到戲院，會合了一個四眼男人，之後去買爆谷，我聽到G.E.M.有問男友：『食乜好？』之後見到G.E.M.買了杯熱飲，跟住她就好似好忙咁低頭按手機，似乎係用手機程式付錢，男友就掛住食爆谷。」

平日有助手等大班人服侍的宇宙G.E.M.，想不到在男友面前變得又體貼又乖巧，雖然熱飲同爆谷只係幾十蚊，但拍拖出街由女朋友負責找數，呢種女仔真係幾難得囉，完全冇港女特質。