（本報訊）29歲的林芊妤（Coffee）今年5月宣布陀B四個月，6月就同拍拖三年幾的圈外男友翟志榮（Weng）結婚，一索得男的Coffee，昨日已經「卸貨」，剖腹誕下7磅重「咖啡仔」。

休息一日，Coffee今日終於在社交網上載影住囝囝耳仔的短片，又指住囝囝耳仔話：「我隻耳仔在度！」Coffee接受《蘋果》訪問話：「囝囝出世好健康呀！7磅重屬標準Size。」講到佢前晚先去朋友生日Party，但轉眼就入了醫院，Coffee就解釋：「其實我本來陀B就已經37周幾，BB已經足月，我隨時都可以生，咁因為我有少少出血，雖然出血都係生之前常有的情況，但醫生都驚我因為有胎盤前置所以出血，咁我同老公都覺得既然都生得，就決定唔等順產喇！」

初為人母，Coffee第一樣就要學餵母乳，佢話第一次餵母乳的感覺好特別：「有點不懂，但好快都上手，其實要同BB互相配合，BB要學識啜乳頭，我又要學識令佢啜得舒服一點。不過因為初初乳腺未出到奶，要好大力按著自己個胸，不停用力按個胸等奶出來，我都好狠呀，好大力，唔理自己痛唔痛就出到奶，我都覺得幾盡責的，想他飲多點奶，人說初乳係最好嘛！」

問老公有冇入產房陪佢同埋剪臍帶？Coffee話醫生負責剪長那條，老公就剪短那條臍帶，佢又笑住話：「我老公好搞笑，他說是硬硬的！」至於囝囝個樣似邊個，Coffee就作狀好唔憤氣咁話：「唉，他似我老公呀，隻耳仔似我的，其他都似我老公多點，手長腳長，以37周半來講算大隻。」問Coffee同老公見到囝囝出世有冇喊？她說因為自己有點緊張，所以醫生給了她麻醉藥，她醒了BB已經出世，而老公就屬於冷靜型，但大家都好開心。