（本報訊）減肥是女人的終生事業，今年24歲的岑日珈（Angie），40吋長腿冇得輸，不過兩年前她亦曾因為情緒病導致身形脹爆，自信跌到最低點。

入行4年，Angie稱已浪費了幾年青春，今年她的起心肝減肥，回復最佳狀態，早前更參與郭富城、楊千嬅主演的《麥路人》，首次扮大肚婆，首次素顏上鏡，首次被掌摑，雖然被摑到面歪，拍生仔戲又嗌到失聲，但她說演員就是要忘我。

24歲的Angie，自覺不是少女了，在角色上有更大發揮︰「好興奮可以拍到咁寫實的片種。我第一次做大肚角色，記得當日同顧定謙做對手戲，他飾演我老公個細佬，那場戲我們在吵架，佢就動手摑我，好嬲好大力。初初他遷就我，不敢大力打，打了五、六次都不用力，導演就親自示範，他那四巴好真，我眼水係咁標，好痛、好有感覺。」

拍完當晚，Angie回家後發覺牙骹劇痛，翌日要找中醫治療︰「因為細個時被媽咪打，我牙骹之前已經歪過，拍完場戲個舊患復發，成塊面歪了，我要去中醫推足一個月至整番正塊面。」拍這部戲，令她完全放下了形象包袱︰「拍之前我不斷上網看大肚婆穿羊水生仔情況，原來下體好似被火燒咁痛，所以拍攝時我叫到聲嘶力竭，最後失聲了一個禮拜。」

迷失了年多，Angie重拾事業心再出發。談到脹爆時期，她的生活就像行屍走肉，人生很灰暗︰「最迷失在2016至2017年，那年不知自己做什麼，街唔想出，連頭髮都唔願洗，好似覺得人生沒有希望，做什麼都好失敗，未做已經想放棄。」

15歲就患上強逼症的Angie，曾因為「不斷重覆檢查」影響生活，甚至遲到上學，後來學校社工轉介醫生，病情得到控制。不過入行後拍完處女電影《PG戀愛指引》後，病情再復發︰「拍完後自己都接受唔到自己的演技，好自責，最難受係我覺得人家給了我那麼好機會，但自己做得咁差，網上有些負評，話我花瓶，對我好大打擊，我都懷疑自己能力，當時唔識釋放壓力，屈埋屈埋，情緒再出問題。」

情緒病復發，Angie惟有向醫生求助，但藥物的催化令她暴飲暴食，170cm身高的她，高峰期試過135磅，不過現在回落到110磅︰「藥物令我放鬆同胃口好，所以漲得快，依家目標係100磅。那25磅我用了三、四個月慢慢減，每日做30分鐘緩跑或緞練肌肉運動。食方面就一日兩餐，主要食綠色食物，多數沙律配雞胸肉，煎炸、油膩、澱粉都戒絕。」

岑日珈感情豐富，近日為新歌排舞時試過邊喊邊跳︰「首歌係講分手，跳時情緒好激動。好開心麥秋成同我排舞，佢好cool，排舞時唔識笑，我好驚佢，不過嚴師出高徒，佢要求高我唔敢怠慢。」

情緒病復發，Angie惟有向醫生求助，但藥物的催化令她暴飲暴食，170cm身高的她，高峰期試過135磅，不過現在回落到110磅。