朱晨麗愛得盲目慳錢貼仔


(本報訊)港姐出身的無綫花旦朱晨麗,事業開始起飛,惟愛情路上仍然跌跌碰碰。入行後發展過幾段情,曾經愛得盲目,不但寧願死慳死抵,都要倒貼生活費,男友一聲令下,更願意戴住對方所送、價值兩蚊雞的廉價手鏈出席活動!儘管多番做順得女友,但戀情統統無疾而終,幸她對愛仍有憧憬,期待真愛來臨!

30歲的朱晨麗外貌標致,裙下之臣當然多,入行7年來緋聞不少,上至神秘富豪、官二代,下至藝人李日朗、黃子恆、何廣沛等,認真精彩!然而朱朱的愛情路上,並非外間認為般順利,相反一個「忙」字成為其死穴,完全抹殺她對感情的付出,絕對是女神唔易做。

半夜開工惹懷疑

身為公司的力捧對象,朱朱當然以事業為先,不過,她對每段感情均百分百付出、真心經營,惟最後卻只能宣告死亡,她接受訪問時說:「之前朋友介紹嘗試同一個圈外人發展,但我太忙,他不明白我的工作性質,淨係知我成日半夜在出面開工,不聽電話同短訊,令佢有懷疑,就算我講事實出來都唔明,最後當然分開,都唔係拍了好久。(咁何廣沛又點?)佢幾好,向事業發展緊,我希望可以同佢在戲入面再續前緣。(伸延戲外?)都幾好,有上進心,靚仔同後生,愛唔愛真係唔知,認識了那麼久,現在是好兄弟囉!將來的事不知,唔敢講得太實。」

自言追求簡單浪漫,笑指一支玫瑰花足已令她爆喊,相當貼地,可惜歷任男友統統沒出這招,反而多送奇特禮物,試過收家具甚至平價手鏈:「收過兩蚊雞的手鏈,他還講說在街邊小販檔買,覺得好得意,我還要扮好鍾意,其實平時我好少戴飾物,但他要我出活動都要戴,不過我尊重佢,愛一個人會全心投入,但甩拖後就冇戴。」愛情果然令人盲目!

盼40歲前生仔

這位男友經濟有困難,朱朱沒有離棄他,在金錢與愛情之間,她選擇了愛情,甚至願意倒貼生活費:「試過好多次都要我幫,心想我人工低過佢,點解我都可以幫?因為平時我不出街,最大開支都只係交通。(點解幾次都可以接受?)唔知,愛情囉!(接受男仔經濟能力低?)依家就要慢慢考慮,這個世代獨立可以,但不可以低過我,或者要我幫佢囉!不過我對婚姻都有憧憬,希望可以組織家庭生小朋友,但唔好太遲,40歲高齡產婦好危險,現在好好向前衝,但我要先解決時間問題,覺得係需要放時間給另一半,因為某程度上,陪伴唔係用錢來衡量。」

劉靜

電話本

發佈時間:2018-09-22
易搜網汽車買賣

老東方傢俱

版權所有 華人今日網