（本報訊）陳凱琳（Grace）同鄭嘉穎星期日（12日）在印尼峇里結婚，昨日才落機返香港，一見到傳媒兩人已經十指緊扣，甜蜜到暈。

　休息一晚，Grace已經復工，在尖沙嘴出席YSL彩妝活動，佢穿上紅色貼身晚裝，話婚後在當地玩了幾日，都有休息過，工作番都好開心。她又說未慣被叫鄭太，聽到會感覺好生外。問到嘉穎現在會怎樣叫她，Grace話：「都係叫我Grace，不過有時都會改口叫我鄭太，我都叫番佢做鄭生，有時叫佢老公，有點感動同毛管恫。」

　返香港後，兩人昨日不是去新居睡，而是去了酒店住，唔通係造人？Grace解釋：「其實我同嘉穎都想relax下，如果住酒店就有人照顧。」咁係咪新居未裝修好，佢話：「唔係，遲些會住。」講起小朋友，佢就話：「其實都有談過，大家都想行這一步，順其自然啦，同佢都有共識。」現在是否不設防努力造人呢？Grace就面紅，尷尬笑：「哎呀，唔好問我咁尷尬的問題啦。」佢又話不會在香港再擺酒，但會同姊妹食飯。

　Grace一直都冇講過嘉穎怎樣求婚，今日佢終於講啦！她說：「上年12月同嘉穎返加拿大，佢在機上求婚，還跪地添。個位好窄，佢都跪地。因為係長途機，他叫我不要睡覺，但我趁嘉穎去廁所就打瞌睡，他返來時叫我打開對眼，我一打開就見他跪在那裡，有戒指有跪地，當時真係感動到喊，覺得係好大驚喜，覺得佢好用心。」