（本報訊）藝人結婚講排場，閃爆鑽飾、豪花場地、出埠影紗相，大家鬥特別，不過江若琳同未婚夫蕭潤邦（Oscar）偏偏玩貼地，他們昨日中午被讀者透過「爆相爆片」影到他們大汗疊細汗在西貢取景，點知瞬間已轉到深水埗繼續影。

據知，江若琳同Oscar輯婚紗相玩轉港九新界，他們選了平日最喜歡去的幾個景點影婚紗相，平時拍拖好鍾意食茶記同車仔麵，所以今次特意揀番去西貢、慈雲山同深水埗這幾區，貪呢地方有熟悉的味道。

昨日下午5點幾，江若琳同Oscar同攝影隊轉了去深水埗，這裡可以話是他們主場，因為他們兩間食肆就在附近，所以Oscar同江若琳索性在店外取景，由街頭影到街尾。穿著便服的Oscar先落七人車打點一下，跟住佢再返上車，同未婚妻江若琳暱埋拉簾於車廂內換禮服婚紗，跟住就落車開始拍攝。

平日經常性放閃的兩人鏡頭前後都sweet爆，做出慣性拖手咀嘴親暱動作。影得婚紗相，當然有指定動作！Oscar應攝影師指示親江若琳額頭，江若琳回吻未婚夫臉頰，他們拍得自然流暢，快拍大約15分鐘就收工再跳上車離開，Oscar同江若琳好有禮貌同記者講拜拜。

記者昨日致電江若琳再次恭喜她，江若琳回覆話：「今日影婚紗相幾辛苦，天氣好熱，走勻我們由細到大對我們好有意義幾個地方，差點曬焦。」Oscar則大呻差點中暑。