（本報訊）江湖傳聞，當年拿完影后寸到飛起的袁詠儀（靚靚），連環得罪影壇大哥成龍同周星馳，95年同成龍合作拍《霹靂火》，傳成龍打電話叫靚靚補錄兩句對白，但打極靚靚都唔接電話。94年同星爺合作拍《國產凌凌漆》，有傳靚靚大言不慚話同星爺風格唔同，最好以後唔好再合作！日前靚靚接受《蘋果》「閃耀人生女人心」連載專訪，親口否認有得罪星爺：「我邊有咁薑呀，我傻而已，我未有咁蠢吧！」

性格率直的靚靚好易得罪人，還要被人話得罪兩位影壇巨星，呢個傳聞傳足20幾年，依家靚靚親口解疑團，先講得罪星爺呢單，靚靚呼冤：「你問我，我就真係唔係好記得有冇得罪佢，我邊有咁夠薑呀！我傻而已，我未有咁蠢吧，我要澄清我係傻，唔係蠢！我一定唔會對有經驗的人講這樣的說話，我自己係一個新人。」咁那時同星爺合作，係覺得風格唔同呢？靚靚話：「我直頭...人家經常講...我完全...冇發生過這件事，我反而覺得係合作得幾開心喎！」

有乜開心呢？靚靚爆料：「他們說星爺未試過萬歲的，但佢就試過我提出有個美術指導生日，我話：『喂！星爺萬歲啦！』佢真係現兜兜拿了$2,000出來萬歲喎，咁如果大家合作得唔愉快，根本就唔會有這種事，有一個美指打扮似男仔，我們還一齊將佢變番女仔，即係在戲外面咁樣玩，應該唔會係不和吧，所以人家成日話你同星爺點，我真係想極都想不明，究竟是什麼不和！」不過，事實真係之後兩人冇再合作，靚靚解釋：「我有聽過這個，因為我那時要去拍《金枝2》，所以就沒機會啦，當然我亦都唔會去find out。」

講完星爺講成龍，去年曾志偉約張智霖同大哥飯局，靚靚知道後主動問志偉，自己可唔可出席，結果斷交22年的靚靚同成龍，一見泯恩仇！靚靚坦言：「前排我會去問大哥，我是否得罪他呢？係因為我都唔知呀，我知我就唔會得罪人啦，我根本就係唔知，所以我才好想去問大哥，因為人家同我講過大哥成日話：『提起呢個人（靚靚）佢都嬲啊！』咁我在另一個角度去看，我覺得我都40啦，咁我想大哥都唔細啦，我們已經叫做行了人生的一些路，我唔想大哥到了某個年紀，提起一個人的時候還會嬲，即係在佛學看，千祈唔好對人起怨恨心，我唔想佢係咁，我想佢身體健康快快樂樂，如果那個人令到你咁嬲，點解你唔去令佢釋懷呢，所以我當日特登跑落去，就係問大哥這個。」

咁現在有冇人令靚靚有怨恨心？佢坦言：「當然有啦，但我選擇唔會憎一個人，我反而漠視佢，我覺得我更快樂。我對朋友係100%付出，我唔係要你100%對我，但唔好出賣我，打個譬如，如果你來同我講佢的壞話，我唔理真好假好，我只有兩個反應，我一係就唔出聲，一係就同你撐到底，我係唔會同你一齊去講佢的壞話，我個人係咁，如果俾我知道，我那個所謂朋友聽到一些我的事，他不管真定係假，佢唔去保護我，呢個人冇啦，唔會是我朋友list度。」

靚靚覺得身為朋友，應該好了解佢的人格：「但冇去幫我，還去踩多一腳，我覺得慘過被騙錢。」靚靚話曾被兩三個朋友出賣，問到係咪已經冇朋友做？靚靚表示：「因為我老公曾經同我講過，多一個朋友好過多一個小人係你身邊，所以我依家會係...我會假囉對佢，唔好再俾佢插多刀囉。」