（本報訊）不少香港家長都話要子女「贏在起跑線」，早前蘇永康就話要幫兩個半月大的囝囝Jazz花200萬入場費報讀playgroup，係咪誇張見仁見智啦！

最近人氣勁旺的王浩信，都有個5歲大的囡囡靖喬(QQ)準備明年升讀小一。但佢近年事業起飛，由去年的《EU超時任務》，到今年的《不懂撒嬌的女人》同《踩過界》都有不俗成績，成為新一代「師奶殺手」之餘，更被視為今屆視帝大熱。工作忙到冇停手，王浩信最近又要為新劇《兄弟》開工，連見老婆陳自瑤(YoYo)同個女的時間都冇，難怪屢傳婚姻亮起紅燈。

讀者Ricky前日透過《蘋果》爆相爆片，表示前日早上11點，在土瓜灣的保良局林文燦英文小學門外遇見YoYo同囡囡，但老公王浩信就繼續不見影。戴住黑超的YoYo拖住囡囡QQ，不知是否要一個人帶住個女四圍頻撲找學校太辛苦，見佢全程個樣好嚴肅，冇乜笑容。而囡囡QQ就打扮成小公主，穿著一條粉紅色裙，好醒神。讀者Ricky話﹕「見唔到王浩信呀，她們在門口等了15分鐘左右，全程冇乜笑。其實我都唔係第一次見到她們，幾個月前在真道書院（將軍澳區）都見過，那次都係見唔王浩信。（好多人面試？）係呀，所以機會唔係太大。」

上周王浩信同YoYo一齊出活動僻謠，都承認自己冷落嬌妻，還自爆囡囡5歲大都未試過一家三口去旅行添。王浩信昨日回覆傳媒時承認要開工，所以都係由太太一個人帶囡囡去面試。但最開心係終於可以一家人去旅行，佢話﹕「剛剛與她們去了個短程旅行，一有時間就陪她們多點啦！不過都希望其他讀者唔好偷影小朋友，唔想影響佢返學啊，唔該晒！亦多謝大家關心！接下來我要去星加坡又要去英國拍外景，又要分開好一段時間。」他還給了個好傷心的表情，看來一家人相聚的時間真係好少好少......