（本報訊）現年37歲的胡杏兒一索得男！早幾天順產誕下麟兒的她，昨日與老公先後上載溫馨照片晒幸福。杏兒透過經理人公司表示已回家，並開始閉關餵人奶。一眾忍口多時的「契媽」黃智雯、胡定欣和李施嬅，大讚BB得意又靚仔。

胡杏兒日前在醫院順產誕下重約8磅的囝囝Brendan Lee，昨日她與老公李乘德（Philip）在社交網宣布喜訊，杏兒上載跟老公做心形手勢護著BB小手的照片，以「我們仨」宣布喜訊，相當溫馨。Philip則上載抱著B仔的照片，見Brendan頭髮多多，Philip則盡顯父愛。

Brendan意指王子

Philip留言分享喜悅：「Brendan呢個名在愛爾蘭的意思代表王子，係我有一晚突然夢到。兒子已出世幾日，係順產，大約7至8磅，非常健康，並有強壯的肺部，媽咪都好好，但她很累，相信產後餵人奶對我們來講係一項新挑戰。杏兒依家唔得閒睇電話，希望大家送上祝福、祈禱，希望佢好好休息，同盡快恢復狀態。」杏兒亦寫道：「我們一家已齊齊整整！」又透過經理人公司說：「我們返家了，都有點累，開始餵人奶，要閉關喇。多謝各位祝福，我們母子平安，好開心順產成功，感恩！」

守了秘密多日的「胡說八道」好姊妹終可以開口恭喜杏兒，胡定欣被問B仔似誰？她說：「我覺得兩個都似喎！一定係遺傳了爸爸媽媽最好的優點，我未見過一個出世咁少時間，但就睩大雙眼周圍望的BB，真係好精靈。」問送了甚麼給契仔？她說：「未有時間準備，等之後探他們時我先送禮物。」黃智雯則表示未有時間探BB：「杏兒Send過相給我們看，BB好得意，我們五個都係契媽，我係細契媽。（BB似杏兒定Philip？）暫時未睇得太清楚，BB個樣每日都變，等去杏兒家當日看清楚！」

陳敏之傳授湊仔心得

李施嬅則讚BB得意：「遲些做番傳統事，訂隻金鐲仔畀BB。BB好得意，喊聲都好得意，聽到心都甜晒，佢仲好靚仔！」問何時輪到她？她說：「我好鍾意小朋友，但未有杏兒咁偉大住，我都係鍾意工作先，遲些啦！」姚子羚則表示之前病了，故沒到醫院探望，但就與胡蓓蔚送了金鐲給BB。至於已為人母的陳敏之坦言會傳授湊仔心得給好友：「等佢坐埋月先，我之後都會探佢，到時同佢Happy Sharing湊BB心得。」