陳凱琳學玩李小龍式雙節棍


(本報訊)歐錦棠同陳凱琳今日在銅鑼灣出席航空公司HK Express活動,該公司將一班客機命名為「小龍」,藉此向李小龍致敬。

歐錦棠係李小龍的超級Fans,雖然前日為音樂劇《馬丁路德》客串演出時,不慎跌斷左手,但佢仍現身支持,包住左手的阿棠,即場示範單手耍雙節棍,見佢耍得揮灑自如,之後還教陳凱琳擺李小龍甫士。問他耍雙節棍有沒有受過傷?佢話:「唔會,雙節棍係我身體的一部份,我9歲已經開始玩,當時用地拖棍自製,整爛屋企好多燈,又打到自己起了好多個瘤。」

歐錦棠講到隻左手的情況:「前日出事,昨日看骨科,照了沒有碎骨,唔使做手術,醫生幫我換了玻璃纖維托,輕身一點,3個星期後可以拆,之後再做物理治療。」對下個月公演的《男女PK大作戰(激笑版)》有冇影響?阿棠表示昨日已經開始綵排,好彩唔多動作,不過原本要做一個打筋斗動作,現在要cut,昨日同聽日本身都要拍廣告,現在要押後。

在生活上,阿棠笑指自己好似住緊安老院,佢笑住話:「沖涼要靠老婆,我鍾意穿窄腳褲,又係靠老婆,每日佢幫兩隻貓清潔完之後,跟住幫我抹,今次教訓我平時要對老婆好,男人污糟邋遢唔緊要!但不可以不著褲出街。」

陳凱琳透露嗲地係李小龍迷,儲了好多李小龍的物品,佢話:「我小時候,爹地唔會給我搞,因為小朋友唔知道有幾珍貴。」講到她昨晚同好友賴慰玲食飯,陳凱琳話:「噚晚一齊煮了泰式晚餐,慶祝下啦,佢年尾都生得。」男友鄭嘉穎係咪第一次出席朋友飯聚?佢話唔係,嘉穎同佢班朋友都好熟。佢指賴慰玲向來都大食,不過比平時食得更多,但係要戒口,所以煮泰式晚餐時唔會太辣。陳凱琳雖然唔肯透露賴慰玲的BB性別,但佢表示已經講好做契媽,仲會幫手改英文名。



劉靜

電話本

發佈時間:2017-09-20
易搜網汽車買賣

老東方傢俱

版權所有 華人今日網